Антось Звычайны запісаў дэбютны EP (+слухаць)

Антось Звычайны – беларускамоўны рэпэр з Ваўкавыску, які днямі выдаў свой дэбютны ЕР з пяці трэкаў запісаны на студыі Nestanda Records (Мінск). "Гэты рэліз складаецца з аповесьцяў і раманаў, укладзеных у фармат некалькіх хвілінаў. Гэта гісторыі чалавека, які хаваецца ад людзкога холаду пад коўдрай, у сваім ўтульным сьвеце", – гэтак прадстаўляе сваю працу выканаўца.

У працы над трэкамі былі задзейнічаны таксама гарадзенскі рэпэр Last Bench і сьпявачка Яўгенія Шчарбакова. Ужывую Антось Звычайны пакуль выступаць не плянуе, затое працягвае актыўную працу ў студыі. Ужо запісаны цікавы дуэт з рэпэрам Angst, таксама гатовы матэрыял для новага міні-альбому, рэліз якога плянуецца на вясну 2016-га. Антось кажа, што плянуе ўразіць сваімі песьнямі нават тых слухачоў, якія дужа далёкія ад гіп-гопу.

Тэкст: паводле Tuzin.fm