"Кальмары": сьмех дый годзе

З нагоды выхаду дэбютнага альбому "Пад піва" лідэр гурта "Кальмары" Сяржук Машковіч заявіў у інтэрвію "Тузіну Гітоў", што не зьбіраецца адмаўляцца ад вобразу дуркаватага хлопца, што сьпявае на трасянцы, распавёў, якім чынам піша тэксты для свайго гурта і для сяброў з :B:N: ды выказаў перакананасьць, што паратунак трэба шукаць у сьмеху: "Мы ў сваіх песьнях сьмяемся з розных жыцьцёвых рэчаў, хоць яны і бываюць часам даволі сур’ёзнымі".

– У чым у прынцыпе сэнс існаваньня гурта "Кальмары"?

– Сэнс існаваньня нашага гурта ва ўсьмешках людзей. Калі іх бачыш на тварах, тады ўсё добра, бо ідэя, якую мы нясем, у тым, каб перакінуцца ў нейкі бесклапотны сьвет, дзе заўсёды весела і пазытыўна. І мы ў сваіх песьнях сьмяемся з розных жыцьцёвых рэчаў, хоць яны і бываюць часам даволі сур’ёзнымі.

– Ці няма ў цябе адчуваньня, што вобраз такога дуркаватага хлопца, што прамаўляе нейкія наіўныя сэнтэнцыі на трасянцы, ужо вычарпаў сябе?

– Абсалютна няма такога адчуваньня, таму што вобраз, у якім я на сцэне, цалкам адпавядае той весялосьці, якую пазыцыянуе гурт. І вось гэтая багна, у якой можа захлынуцца кожны, мусіць уся зьнікнуць падчас нашых выступаў.

– Ты спрабуеш пісаць даволі жыцьцёвыя і сур’ёзныя тэксты для :B:N: і вясёлыя ды нязмушаныя для "Кальмараў". Ці можаш падзяліцца, як адбываецца працэс уласнай настройкі і напісаньня?

– Так, пэрыядычна пішу, як для аднаго, так і для другога гурта, але гэта не адбываецца так, што сёньня для "Кальмараў", а заўтра для "бээнаў". :B:N: грае ў іншай стылістыцы, там больш глыбокае адчуваньне навакольнага, а "Кальмары" — гурт настрою, грае музыку, у якую ня трэба ўдумвацца. Працэсс напісаньня просты, :B:N: я пішу, калі Алесь Лютыч аддае гатовую, так званую "рыбу", і пад яе ўжо робіцца тэкст, а для "Кальмараў" тэкст можа атрымацца ў кожны момант. Круцяцца словы ў галаве і я іх тады пераношу на паперу.

– А вось цікава: ты тэксты канструюеш ці яны да цябе прыходзяць самі, а табе толькі запісаць іх трэба?

З тэкстамі бывае па-рознаму, магу пад нейкую пэўную тэму рабіць, а магу і ноччу прысьніць, тут галоўнае пасьпець запісаць.

– Слухач :B:N: і "Кальмараў" можа быць адным і тым жа чалавекам?

– Канечне можа, так як і любы чалавек у розных абставінах можа жартаваць, а можа быць сур’ёзным.

– А чыёй творчасьцю вы самі падпітваецеся?

– Нас у гурце сем чалавек, у кожнага розны музычны густ, вось з такой сваеасаблівай мяшанкі і складаецца наша творчасьць. Што тычыцца мяне, то я вельмі люблю чытаць Караткевіча, а вось з улюбёнай музыкі нечага ня вылучу, бо шмат чаго ёсьць цікавага. Як кагосьці запамятаеш, пакрыўдзяцца яшчэ (сьмяецца).

– Ты бы пайшоў шляхам Яўгена Валошына і гурта HandmadE: узяў бы ўдзел у якім тэлешоў на дзяржаўным тэлеканале?

– Для мяне галоўнае разьвіцьцё гурта ў музычным пляне. Канечне, мне бы хацелася, каб і на дзяржаўных і на недзяржаўных каналах гучалі і мы, і нашыя беларускія выканаўцы, прычым розных стыляў. А наконт тэлешоў магу сказаць, што ў нас напэўна і няма такога, каб хацелася нешта паглядзець, акрамя канечне тых праектаў, што робіць паважаная мной, Аксана Вечар. Такое маё суб’ектыўнае меркаваньне.

– Што зь сябе ўяўляе новы альбом "Кальмараў"?

– Ён завецца "Пад піва". Матэрыял ужо запісаны на студыі Паўла Яноўскага "Таксафон". Вокладку малюе Яўген Бузоўскі, таксама з гурта IQ48. Запісалі 11 песень, будзе яшчэ на дыску тры бонус-трэкі. Ужывую зьбіраемся паказаць у Менску гэтай зімой. Мусіць у бліжэйшы час дамовімся і наконт яго выданьня.

Тэкст: Іван Бяспалы, "Тузін Гітоў"