Red Hot Chili Перцаў

Мэнеджар гурта Green Pepper Аляксандар Перцаў даслаў ліст з зьнявагамі і пагрозамі музычнаму журналісту Зьмітру Безкаравайнаму за тое, што ён сказаў нядобрае слова на адрас каманды ў сваім прыватным блогу. Журналіст бачыць усе падставы, каб зьвярнуцца ў суд, але лічыць, што Перцаў ужо сам сябе пакараў...

Канфлікт між мэнеджарам Green Pepper (і да ўсяго бацькі вакаліста каманды) Аляксандра Перцава з музычным журналістам Зьмітром Безкаравайным пачаўся пасьля заўвагі апошняга ў сваім прыватным блогу з нагоды навіны пра запіс другога альбома каманды. "Будзе такая ж какашко, як дэбют ці трошачкі палепей?", – напісаў Зьміцер. Гэты пост выклікаў неадназначную рэакцыю ў Аляксандра Перцава, які даслаў журналісту ліст з зьнявагамі, абразамі, пагражаючы таму "разгайдаць зуб", калі ён яшчэ нешта напіша. Гэты ліст цалкам цытуецца ў блогу Зьмітра Безкаравайнага.

"Привет, юродивый!! Местоимение ВЫ, я исключаю из общения с тобой, потому что, кровать тоже местоимение. Меня просили не реагировать на твое хамство, но я не сдержался, извини. Узнав, кто увидел в 16-ти летнем вундеркинде талант, ты – обделаешься! Хотя нет, тебя устраивает твой белорусский нимб. (И ты будешь поносить все, что тебе неугодно, а вкус у тебя – казахского акына). Знаешь, я хотел многое написать, а потом понял, что терять время на общение с ass hole, не буду... Вякнешь (одно из любимых слов Моего Президента) – подам в суд, за поведение, недостойное журналиста (хотя, какой ты, к черту, журналист), а еще что-то напишешь, придурок, я тебе расшатаю зуб (Семнадцать мгновений судьбы, серию забыл) Ну, ты и гнида! Захочешь встретиться – звони, почти у всех моих друзей (к сожалению, и твоих), есть мой номер телефона. P.S. Вспомни, кем ты был в 16-ть лет, дегенерат!!! И, если я, услышу или прочитаю, что-либо негативное в адрес свой или близких мне друзей, поверь, я изыщу возможность поставить зарвавшуюся тварь, типа тебя, на место!!!"

"Мой камэнтар быў не пра асобы музыкаў, а менавіта пра альбом. То бок аніяк гэта нельга тлумачыць як пэрсанальную абразу. А вось яго адказ якраз пэрсанальная абраза з пагрозамі, – кажа Зьміцер. – Ствараецца ўражаньне, што гэты чалавек гатовы перасьледваць абразамі і пагрозамі любога блогера, які напіша пра творчасьць гурта Green Pepper нешта, што не адпавядае яго думкам".

Аляксандар Перцаў пацьвердзіў у размове з Tuzin.FM, што гэты ліст яго аўтарства, але зьвярнуў увагу на тое, што ён стаў вынікам доўгай размовы. "Я адэкватны і выхаваны чалавек. Першапачаткова я зьвяртаўся да Зьмітра на "вы" і прасіў, каб ён прынёс прабачэньні і прыбраў сваё выказваньне. Так, гэта яго прыватны блог, але чытаюць яго ля двух тысячаў чалавек. Навошта гэта выносіць? Пакінь сваё меркаваньне пры сабе! Па выніку ж, з кантэксту быў выдзернуты апагей майго негатыву. Зрэшты, і там няма брыдкаслоўяў і зьнявагаў, усе словы літаратурныя", – кажа Аляксандар. На яго думку, Безкаравайнага "задушыла жаба" з той нагоды, што Green Pepper зараз піша альбом у Рыме і Лёндане (Зьміцер досыць нізка ацаніў іх дэбютную працу).

Зьміцер Безкаравайны кажа, што калі б яго сапраўды ветліва папрасілі, ён бы прыбраў пост, аднак ніякіх "адэкватных" лістоў не атрымліваў. Затое хамскіх камэнтароў ад Перцава мае досыць, прычым як выказаных ў камэнтарах у блогу, так і дасланых прыватна (усе яны захаваныя). Журналіст сьцвярджае, што ніякага асаблівага стаўлення да Green Pepper ў яго няма. "Гурт ня тое, каб суцэльна кепскі – музыкі добра валодаюць інструмэнтамі, але з матэрыялам пакуль што бяда. У гэтым кантэксьце патаснае паведамленьне пра Лёндан і Рым было сапраўды сьмешным. Хлопцы яшчэ проста вельмі маладыя – на момант запісу дэбютніка ім было 16, зараз недзе 18. Аляксандар і сам часам на гэта спасылаецца, як на нейкае апраўданьне. Мне падаецца, што вялікая яго памылка, – і як мэнэджэра гурта, і як бацькі вакаліста,- у тым, што ён адразу пачаў прасоўваць яшчэ не абстраляны гурт па-сур'ёзнаму: з афіцыйным альбомам, зь вялікай прэзэнтацыяй, з занадта гучнымі заявамі. А калі ты лезеш у дарослы шоў-біз, то і ацэньваюць цябе па-даросламу", – заўважае Зьміцер Безкаравайны. Ён кажа, што мае ўсе падставы, каб зьвярнуцца ў суд, але ня бачыць сэнсу распачынаць справу: "Мне здаецца, што ён сам сябе пакараў ўжо і да таго ж нашкодзіў свайму сыну. Калі ён прынясе прабачэньні – добра, калі не – няхай гэта будзе на яго сумленьні".

Аляксандар Перцаў гатовы прынесьці публічныя прабачэньні. Але толькі пасьля прабачэньняў на свой адрас. "Першы крок зрабіў усё ж ён. Пасьля свайго "прабачце", Зьміцер атрымае ў трыццаць разоў болей выбачэньняў".

Што да музыкі, то мэнеджар Green Pepper заўважыў, што ў апошнія дні цікавасьць да гурта істотна ўзрасла і колькасьць праслухоўваньняў іх трэкаў у сеціве стала большай. Праўда, наўрад ці гэты канфлікт адаб’ецца на рэпутацыі гурта станоўчым чынам.

Тэкст: Сяргей Будкін, Tuzin.fm