Fratrez выдаў альбом на мяжы драматычнага, рокавага і сузіральнага (+слухаць/+спампаваць)

Гурт Fratrez выдаў дэбютны альбом пад назвай "Ora". "Гэта музычная гісторыя, у аснове якой ляжыць спалучэнне драматычнага, рокавага і сузіральнага. "Ora" – момант унутранага дзеяння, імгненне адхілення ад разбуральных карцін рэчаіснасці. Пяць "ор" – пяць станаў, – распавядае пра рэліз лідар гурта Сяргей Доўгушаў.

Музыка Fratrez уключае ў сябе разнастайнасць рытмаў, музычных формаў і адценняў, вакальную імправізацыю, спевы на "мёртвых" мовах і дыялектах. На пачатковым этапе галоўным накірункам творчасці гурта з’яўляўся эксперыментальны сінтэз музыкі і тэатра. Са з’яўленнем праграмы "Ora" гурт перайшоў да новага гучання.

– Гэта музыкі, якія размаўляюць на мове гукаў. Гукі ствараюць музычныя формы.Формы – адлюстроўваюць душэўныя перажыванні, – так апісвае творчасць Fratrez мастацтвазнаўца і дырэктар музея імя Заіра Азгура Аксана Багданава.

Менавіта ў музеі Азгура з дапамогай вядомага гукарэжысёра Віктара Кісценя і быў запісаны альбом "Ora". Запіс быў зроблены яшчэ ў 2011 годзе, але дыск выйшаў толькі зараз.

Праект Fratrez быў створаны ў красавіку 2008 году ў Мінску чатырма прафесійнымі музыкамі: Сяргеем Доўгушавым (вакал,тэксты), Настай Паповай (скрыпка), Андрэем Еўдакімавым (гітара) і Вольгай Паляковай (флейта). З 2011 года ў складзе гурта з'яўляюцца новыя таленавітыя ўдзельнікі – Ілона Лесь (віяланчэль) і Аляксандр Ясінскі (баян).

Творчы шлях гурта вельмі разнастайны: спачатку гэта стварэнне пэрфомансаў ("Um via", "Daps"), потым – архаічная праграма "Sator" (2010), музыка да старажытнага містычнага паліндрома "Sator-Arepo-Tenet-Opera-Rotas", праграма на розных дыялектах "Kigo" (2010), першы дэма-CD, а цяпер і альбом "Ora".

Альбом "Ora" хутка можна будзе набыць у крамах Мінска, а таксама падчас канцэрта-прэзентацыі, які адбудзецца 7 чэрвеня ў музеі Азгура.

Тэкст: Ultra-Music