Лук’янчык з аркестрам і з Folkmashina (+відэа)

Былы ўдзельнік "Троіцы" ды "Альтанкі" Зьміцер Лук’янчык сышоўся з ансамблем салістаў Classic-Avantgarde. Разам яны зрабілі пару кампазыцыяў і прадэманстравалі іх на выступах у Менску ды Віцебску. Акром таго, Зьміцер узяўся за новы праект Folkmashina.

Зьміцер Лук’янчык распавядае, што быў прыкладна год таму з аказіяй у Белдзяржфілярмоніі. І яго пазнаёмілі з кіраўніком "Клясык-авангарду" Ўладзімерам Байдавым. "Як высьветлілася, тое, што робіць Байдаў з аркестрам, вельмі цікава мне, а яму стала цікава тое, што раблю я – то бок, пяяньне песень пад бубны альбо балалайку".

Неўзабаве пасьля тае сустрэчы меў адбыцца канцэрт "Клясык-авангарду", да якога звычайна далучаюцца запрошаныя музыкі. Байдаў і Лук’янчык вырашылі зрабіць сумесную рэч – апрацоўку народнае песьні "Казачэ". Аркестроўку выканаў гітарыст Сяргей Пятроўскі, былы гукарэжысэр вакальнае групы.

Напрыканцы мінулага году зьявілася яшчэ адна кампызыцыя "На йгрышчайка", прэзэнтаваная на калядных выступах "Клясык-авангарду". Некалі "Альтанка" яе прадстаўляла на "Тузіне гітоў". Цяпер супраца Лук’янчыка зь філярманічным ансамблем салістаў павінна працягнуцца ў выглядзе студыйнага запісу. "Узаемныя сымпатыі засталіся, але канкрэтнага пляну няма", – прызнаецца Зьміцер.

Што да свайго сыходу з "Альтанкі", Лук’янчык гаворыць: "Варта было распачаць новы этап. Зьявілася адчуваньне балота, безвыходнасьці. І сваю музыку я пачаў бачыць інакш. Я ня супраць таго, што "Альтанка" цяпер працягвае дзейнасьць безь мяне. Але тое, чым гэта працягнулася, мне не даспадобы. Канцэпцыя стала зусім незразумелая".

Новы гурт Зьмітра Лук’янчыка завецца Folkmashina. У склад трапілі Аляксей Гладыш (бубны) і Цімур Рэйзіс (клявішы). "Гэтая музыка больш рытмічная й актыўная, чым яна была ў "Троіцы" ды ў "Альтанцы"", – параўноўвае Зьміцер. Рыхтуецца праграма, увесну-улетку адбудуцца выступы Folkmashina ў Эстоніі і Літве.

Тэкст: Віктар Сямашка, Tuzin.fm