О проекте

Маша Калеснікава: асабісты топ-10 беларускіх альбомаў за 2012 год (+аўдыё)

 

Пазаштатны эксперт і сябра "вялікага журы". Музычны рэдактар, аўтар і вядучая праграмы "КаляРока" на "Аўтарадыё" (2004-2007). Ад 2008 – музычны рэдактар і журналіст "Еўрарадыё". Удзельніца гуртоў "Яр" і Hoha Band, творчы псеўданім – Маша Яр.

І зусім мы не ў балоце. Яно пераўтварылася ў бурлівае мора, якое ўрываецца ў вялікі музычны акіян. Цяпер тут жывуць не толькі беларускі і рускі рок, барадаты фольк і празрыстатвары поп. Тут валадараць халодны індзі, ліхтарныя фрыкі, культурныя джэнтэльмены і неверагодныя маленькія жанчыны, здольныя напісаць музыку з мінулага і будучага. А яшчэ Макс Корж – і сапраўды аншлагавы Палац спорту. Беларуская музыка выходзіць за межы традыцый і мае мэтай здзіўляць.

1. Серебряная Свадьба "Laterna Magica" – слухаць

Люблю музыку, якую пішуць жанчыны. Праз яе цікава назіраць за разнастайнасцю жаночых вачэй і поглядаў. І хоць летась хапала моцных альбомаў, створаных пры ўдзеле жанчын (Clover Club, Sang Sattawood), але ў сваёй дзясятцы адзінае (і пры гэтым першае) месца аддаю галоўнай жанчыне – Беньцы і ейнай "Laterna Magica". Таму што ў альбоме, як і ў сэрцы Бенькі, плывуць караблі, за штурвалам якіх стаяць капітаны. А ў вачах капітанаў адлюстроўваецца вясёлка, што расфарбавала неба пасля дажджу…

2. Hair Peace Salon "Gentleman" – слухаць

Джэнтэльменскі ўчынак для музыкі, якая заўсёды пакарала паветранасцю і прыгажосцю, але мела магчымасць так і не зрабіцца альбомам. Добрым, светлым, з фантастычна прыгожымі мелодыямі і галасамі самага ўдалага мужчынскага дуэта ў беларускай музыцы апошняга часу. Спружына, якая пры выпростванні не робіць больна, а лагодзіць.

3. Сяргей Пукст "Внутреннее" – слухаць

Абсалютна шчыра запісваюся ў шэраг пукстаманаў – Сярожа прыўкрасны ва ўсіх сваіх праявах і амплуа. У дадзеным выпадку давялося прымушаць сябе абстрагавацца ад мелодыі і слухаць тэкст пра ўнутранае і ўнутранасці. Не вельмі вясёлы альбом ад вясёлага Пукста.

4. ДахаБраха і Port Mone "Хмелева Project" – слухаць

Любімы да болю і звядзення скулаў фолк у моры сузірання і пошуках існасці. Узрыўная сумесь гарбаты з мелісы ды празрыстага лёду, іголак ды нітак, аскепкаў ды мяцёлкі, чырвонага і белага, мудрага і бестурботнага.

5. Botanіc Project "Реанимация" – слухаць

Неверагодная мяшанка дзіцячых тэкстаў і дарослых мелодый. Пры чым, мелодый запамінальных, грунтоўна аранжыраваных і выпеставаных. Крокі побач з Джа, і ламбарджыні насустрач.

6. Палац "Кола грукатала" – слухаць

"Палацава" музычная дарожка роўная, без валуноў і ямін. Толькі кола грукоча магутна, рытмічна і аптымістычна. Ды месяц лунае ды пазірае чыстым святлом. Ды страла ляціць далёёёка…

7. Дай дарогу! "Сквозь говно" – слухаць

Жорсткі панк-рок, спеты радасна ды з усмешкай. Шанец зірнуць на жыццё тых, каго не сустрэнеш у галерэі "Ў". Горка, сумна, іранічна і жывёльны драйв.

8. Akute "Не існуе" – слухаць

Пра дзевачак і космас толькі ўжо з іголкамі. Музыкі трымаюцца курсу, які абралі на першым альбоме, аднак спрабуюць пазіраць па баках. Халодная і з пярсцёнкамі пласцінка.

9. Кассиопея "Сердце отдаю детям" – слухаць

Стакан, Д’Артан’ян, Харацьян, 100 грам рыбных катлетах і вечная маладосць пад нестарэючыя рытмы старых сінтэзатараў. Сапраўдныя беларускія танцы ад шчырага беларускага трыа.

10. Мох "Плашка" – слухаць

Таксама запісваюся ў суполку мохаманаў, хоць асабіста не маю гонару быць знаёмай з Антонам Крывулям. Я люблю музыку "Плашкі" за радасць, бестурботнасць і знарочыстую няправільнасць. Гэта вельмі крута – быць сур’ёзна несур’ёзным у музыцы, дзе ўсё веееельмі сур’ёзна.

Experty.by


Чтобы оставить свой комментарий к этой публикации, войдите в систему. Нам важно ваше мнение!

Или авторизируйтесь посредством:

 

RSS

RSS-материал

награды Experty.by

рецензии и аудиозаписи

алфавитный каталог

  • более 350 альбомов
  • онлайн-прослушивание
  • описания и рецензии
  • ссылки на легальное скачивание

Последние комментарии

 
 
Developed by Lynxlab.net