Фолк-дыскатэка ад гурта Pawa (+спампаваць)

Грамадская кампанія "Будзьма Беларусамі!" предстаўляе дэбютны альбом праекта Pawa, да якога маюць непасрэднае дачыненне музыкі гурта Testamentum Terrae. Дыск спалучае мадэрновыя рытмы з гучаннем старажытных аўтэнтычных інструментаў.

Юрась Панкевіч, кіраўнік Testamentum Terrae, расказвае пра з’яўленне праекта: "Pawa – гэта сумесны праект музыкаў гурта Testamentum Terrae і музыкі Мікіты Седзянкова. У супольным праекце Мікіта выступае пад псеўданімам Niko_s, а музыкі калектыву застаюцца самімі сабой, вернымі "сваёй" этнічнай справе. Нам заўжды хацелася зайграць сучасную музыку з электроннымі рытмамі і пачуць старыя песні і мелодыі на новы манер.

Фактычна гэта новы гурт, які будзе мець назву Pawa і граць электронную музыку, заснаваную на беларускім фолку. Фолк-дыска, калі хочаце. Першы альбом прадставіў сучасныя апрацоўкі васьмі кампазіцый з альбома гурта Testamentum Terrae "Англеза". Мелодыі выкананыя ў арганічным яднанні гучання этнічных беларускіх і сучасных электронных інструментаў. Мы спадзяемся, што нашае жаданне граць у больш шырокіх музычных стылях будзе даспадобы слухачу".

У 2011 годзе ў айчынным шоу-бізнэсе спалучэнне этнікі з сучаснымі электроннымі "фішкамі" становіцца трэндавым. Менавіта ў гэтым кірунку працуюць Akana-NHS, Стары Ольса, новы праект Русі – Shuma, з гастрольнымі турамі па краінах СНД ездзіць, не страчваючы актуальнасці, фолк-мадэрнавы "Палац".

Спампаваць дэбютны альбом гурта Pawa можна тут.

Тэкст: Budzma.org, Experty.by