Гурт Znich прадставіў першы за 5 год альбом (+слухаць)

Гурт Znich прадставіў новы альбом "Чорны сімвал". Музыкі сцвярджаюць, што гэта першая настолькі якасная кружэлка каманды, што яе "не сорамна паказаць людзям". На дыску 11 кампазіцый, запісаных гуртом у Гомелі на студыі, вядомай па працы з "ТТ'34".

"Гэта альбом пра чалавека, пра тое, што ў яго ўнутры, пра яго адчуванне сябе, сваёй зямлі, таго, што навокал", – кажа Аляксандр, басіст гурта, якому належыць аўтарства большасці рэчаў на пласцінцы.

У адрозненне ад папярэдніх прац Znich, на новым дыску толькі адна "народная" кампазіцыя. Таксама ёсць трэкі, напісаныя на вершы Максіма Багдановіча. Хаця, як кажа Алесь Таболіч, і ў тэксах Багдановіча, і ў тэкстах басіста Аляксандра лёгка прасочваецца "народная лінія".

"На альбоме па-ранейшаму гучыць дуда і народныя духавыя інструменты, – дадае Таболіч. – Але з'явілася вельмі шмат электронных гукаў, мы адмыслова надалі ім шмат увагі".

Тэкст: Маша Калеснікава, "Еўрарадыё"