"Дзецідзяцей" прыпыняюць дзейнасьць

Гурт "Дзецідзяцей" заявілі пра сыход у бестэрміновы адпачынак і атрымалі сымбалічную перамогу ў 19-м туры на "Тузіне Гітоў". Удзельнікі гурта Ганна Хітрык, Зьміцер Есяневіч і Міхась Зуй распавялі "ТГ" пра прычыны разладу. "Гэты адпачынак можа ня скончыцца", – кажа Ганна. "Ва ўсім вінаватыя маладушнасьць і ганарлівасьць", – кажа Зьміцер.

Пра прыпыненьне дзейнасьці гурт заявіў на сваім сайце. "Вам, як і нам, пакуль цяжка гэта ўявіць, але паверце: гэта сапраўды неабходна", – вядзецца ў звароце да прыхільнікаў.

Ганна Хітрык ня вельмі ахвоча камэнтуе такое рашэньне. "Не хацелася б пакуль пра гэта казаць. Гэта адпачынак бяз тэрміну. Які можа і ня скончыцца", – сказала яна. Наконт таго, што стала прычынай прыпыненьня дзейнасьці, яна толькі зазначыла, што з творчасьцю ў камандзе ўсё ў парадку. Прычына – у чалавечых адносінах.

"Калі мы былі бы мудрэйшымі, то перажылі бы гэты крызыс, – з роспаччу кажа ўдзельнік гурта Зьміцер Есяневіч. – Ва ўсім вінаватыя маладушнасьць і ганарлівасьць, якія апанавалі ўсіх нас траіх. У пэўны час мы пачалі раздражняць адзін аднаго. Таму сыйшліся на тым, што трэба ўзяць паўзу".

"Складана вызначыць прычыну, бо за ўвесь час назапасілася шмат дробязей, якія ўрэшце сталі вельмі важкімі. Спадзяюся, што жаданьне сабрацца ўсім разам у нас яшчэ зьявіцца. Прынамсі, мне гэтага хочацца", – так пракамэнтаваў сытуацыю Міхась Зуй.

З музыкай сувязі ўдзельнікі гурта перапыняць ня будуць. Ганна задзейнічаная ў якасьці запрошанай вакалісткі ў праекце "У нескладовае", а Міхась і Зьміцер маюць свой праект пад назвай "Или-или". Да ўсяго ўсе ўтрох працягваюць працаваць у адным і тым жа месцы – Нацыянальным акадэмічным тэатры імя Янкі Купалы.

Сяргей Будкін, "Тузін Гітоў"
Фота: Юра Сідун, "Generation.by"