Gurzuf выдаў апошні альбом (+слухаць)

Баянна-барабанны дуэт Gurzuf, які даўно не даваў канцэртаў, нарэшце падаў прызнакі жыцця. Ён запісаў і выдаў 20-хвілінны альбом, праца над якім вялася каля году. Магчыма, гэта апошняе, што авангардны беларускі баяніст Ягор Забелаў і бубнач Арцём Залескі зрабілі разам.

""Märchen" – гэта першая паўнаватасная студыйная праца Gurzuf, – расказвае лідар гурта Ягор Забелаў, які завітаў у студыю "Еўрарадыё". – Мы з Арцёмам Залескім гралі канцэрты 7 гадоў, і акурат пасля гэтага мы ў нешта ўтыкнуліся і нешта знайшлі. І ў гэтых дзвюх кампазіцыях у нас атрымалася нейкім іншым чынам сумясціць бубны і баян. То бок, не ў кропку, не прама, а так пабудаваць барабанныя і баянныя партыі, што кожны новы гук баяна прадвызначае ўдар бубнаў, ці, наадварот, кожны ўдар бубнаў раскрывае гук баяну."

У запісу таксама прысутнічаюць і іншыя інструменты, якія аздабляюць баянна-барабанны дуэт яшчэ і гукамі духавых: валторны, кларнета, альт- і барытон-саксафона, а таксама скрыпкі, цымбалаў і рознай перкусіі. На жаль, тура ў падтрымку новага альбома "Гурзуфа" не прадбачыцца. Ягор кажа пра творчую паўзу, якую ўзялі цяпер музыкі. "Магчыма, гэта апошняе, што мы зрабілі разам," – дадае ён.

Пазнаёміцца з бягучымі праектамі баяніста Ягора Забелава можна на яго афіцыйным сайце www.yegorzabelov.com.

Паслухаць альбом можна тут..

Тэкст: Міла Котка, "Еўрарадыё"