Гурт "9 міліметр" плануе прымусіць слухачоў задумацца

Гурт "9 міліметр", які пазіцыянуе свой стыль, як інтэлігентны панк, запісаў дэбютны альбом. Засталося толькі звядзенне ды майстарынг, які музыкі плануюць скончыць ужо ў траўні.

"Апроч эмоцыі, якая прысутнічае ў стылістыцы панка, мы сваімі песнямі, тэкстамі ды ўсім астатнім спрабуем прымусіць людзей усё ж такі думаць, – тлумачыць уласнапрыдуманую стылістыку трубач ды канферансье гурта Міхаіл Есьман. – То бок, у нас не проста "мама анархия, папа стакан портвейна", а мы хочам данесці да людзей нейкія сацыяльныя тэмы, каб гэта ўсё не бяздумна было. Плюс – уключаем пэўную самаіронію. То бок, дадаём нейкага інтэлекту, як нам падаецца. Можа ў нас гэта і не атрымліваецца, але вельмі б хацелася".

Плануецца, што на дыску будзе адзінаццаць трэкаў, адзін з якіх – "Слова правды" – магчыма, дасць назву і будучаму дэбютніку. Да таго ж, музыкі замовілі кліп на гэтую песню рэжысёру Міці Сямёнаву, які раней працаваў над відэа для гуртоў "Или-Или" ды "Без Білета". То бок, "9 міліметр" вырашыў глабальна падыйсці да прэзентацыі дэбютніка, "бо хадзіць сярод гуртоў, якія з'яўляюцца маладымі ды перспектыўнымі, ужо пачынае надакучаць", – прызнаецца Міхаіл.

Тэкст: Ілля Маліноўскі, "Еўрарадыё"