"У Нескладоваму" жыць, пакуль ёсць у Беларусі вакалісты! (+фота/+відэа)

Таго самага Рамана Арлова можна смела назваць галоўным (на сённяшні момант) музычным авантурыстам Беларусі. Бо прыдумаць ні што іншае, як прасоўванне беларускай музыкі на Усход за кошт беларускай мовы – сапраўдная авантура. І першы крок авантуры – дэбютны альбом, прэзентацыі якога адбыліся ў Маскве і Мінску.

Увогуле з аднаго боку можа падацца, што праект "У Нескладовае" – хаўрус музыкаў-няўдачнікаў (выключэнне – музыкі-акампаніятары і Аляксей Хлястоў). Вось глядзіце: Яўген Чалышаў – выдатны кампазітар і выдатны спявак, уласны гурт якога – "Харлі" – знік з музычнага небасхілу некалькі гадоў таму, а сам Жэня піша песні папулярным на БТ артыстам. Віктар Рудэнка – аўтар электрычнага року на Беларусі і лідэр гурта "Dali", які асаблівай папулярнасцю ў роднай краіне і па-за яе межамі не карыстаецца. Аляксандр Памідораў – вялікі чалавек, альбом якога знаходзіцца ў напаўгатовым стане і ніяк не дасягне фанатскіх плэераў. Аня Хітрык – патрапіла ў кампанію Арлова напрыканцы сваёй "дзіцячай" кар’еры. Спіс можна працягваць… З іншага боку кожны з музыкаў праекту – асоба, якая адбылася ў творчасці. Чаму б у свой вольны час такой асобе не патусіць з сябрамі і не стварыць новы амбіцыйны праект, праўда?

Раман Арлоў

Канстанцін Гарачы (Apple Tea), Вадзім Марголін

Маскоўскі прадзюсар "У Нескладовага" Зміцер Вайтэнка не хавае сваёй веры ў праект і кажа, што жыхары Масквы нарэшце пачулі хараство беларускай мовы і ўбачылі сапраўдных прафесійных музыкаў, якія яшчэ і спяваюць песні на гэтай мове. Карацей, прарыў адбыўся!

Віктар Рудэнка (Dali)

Зміцер Вайтэнка: "Рома Арлоў у прынцыпе вельмі вялікі авантурыст па жыцці. Але я ў яго веру. Гэта мой вялікі сябра. Я прадзюсую гэты праект у Маскве, і па тых водгуках , якія масквічы зараз даюць, і па тых каментарах, якія яны пакідаюць у сацыяльных сетках, гэта прарыў. Гэта новы прарыў у Маскве, менавіта ў Расіі. У Маскве людзі проста адкрылі вочы! Яны кажуць, што такога яшчэ не бачылі, і ніяк не чакалі, што звычайныя беларускія музыкі з невялікай краіны, якая побач – краіна-сястра-суседка, могуць быць настолькі прафесіянальнымі, цікавымі і самадастатковымі. Вось. Я вельмі веру ў гэта, буду гэтаму дапамагаць і намагацца, каб гэта развівалася".

Вадзім Марголін, Аляксей Хлястоў

Аляксей Хлястоў, Раман Арлоў

Еўрарадыё: То бок, ідэя ўкаранення беларускай мовы ў Расіі можа быць паспяховай і мець жыццё?

Зміцер Вайтэнка: "Менавіта, менавіта так! Яшчэ год таму я раіў беларускім калектывам: "Хлопцы, спявайце па-руску, вас тут не разумеюць!"І зараз я зразумеў, наколькі я моцна памыляўся".

Аляксандр Памідораў

Алег Хаменка ("Палац"), Аляксандр Памідораў, Віктар Рудэнка (Dali), Раман Арлоў

Ідэю, у якую так верыць Вайтэнка, галоўны "джэйморс" Беларусі Уладзімір Пугач, а па сумяшчальнасці і вакаліст "У Нескладовага", называе "лухтой ад сівой кабылы", і удзельнічае ў праекце выключна па двзюх прычынах.

Уладзімір Пугач: "Я тут па дзвюх прычынах: першая прычына – Рома Арлоў, і другая – я музыку люблю. Мне прапанавалі як запрошанаму вакалісту праспяваць песню ў дуэце з Русяй. Нешта атрымалася. Гэта, падобна, увайшло ў альбом, судзячы па тым, што мяне сюды паклікалі спяваць. А вось уся ідэалогія, якую яны будуюць вакол гэтага праекту з майго пункту гледжання – лухта ад сівой кабылы. Я Роме пра гэта шчыра кажу, таму не саромеюся і вам сказаць. То бок, я не разумею, як можна браць на сябе функцыі Міністэрства культуры, калі яно і так існуе".

Уладзімір Пугач ("J:морс")

Вадзім Марголін, Раман Арлоў

Паводле Уладзіміра, Раман Арлоў для сапраўднай паспяховасці праекта і пераўтварэння яго ў гурт павінен знайсці сабе добрага вакаліста. Аднаго вакаліста. Тады, магчыма, гурт зажыве доўгім жыццём.

Уладзімір Пугач: "Колькі праект праіснуе – я не ведаю. Я Роме жадаю, каб ён праіснаваў доўга, пакуль не скончацца ў Беларусі вакалісты! Я б хацеў, каб у Ромы заўсёды была магчымасць для самарэалізацыі, ён – выдатны хлопец у такія моманты. Напрыклад, зараз!"

Вадзім Касалапаў (Neo), Раман Арлоў

Канстанцін Гарачы (Apple Tea)

Апроч Уладзіміра Пугача, які, дарэчы, выканаў на прэзентацыі песню "ў духу J:Морс", на сцэне Рэактара, дзе, уласна, і адбывалася свята жыцця, з’явіўся паспяховы Аляксей Хлястоў, які, дарэчы, бліскуча выканаў песню "Сусвет", і апынуўся някепскім шоў-мэнам. Асцярогі музыкі не апраўдалі сябе – ніхто са сцэны яго не выгнаў і зала абсалютна дружалюбна прыняла Хлястова ў шэрагі рокераў!

Аляксей Хлястоў: "Мне проста цікава зразумець – я ўпісваюся ў кантэкст усяго гэтага, ці не? Мабыць, пасля сённяшняга вечара я зразумею, ці гэта так. Бо ўвогуле ўсе кажуць – прыкольна, клёва, класна, усё добра. Але мне трэба зразумець. Магчыма, у гэтым мне дапаможа публіка. Творчасць робіцца для людзей, то бок людзі прыходзяць на канцэрты, набываюць квіткі, адпаведна ёсць прыбытак. Сённяшняя прома-акцыя-канцэрт пакажа, наколькі публіка будзе цёпла ставіцца да нас, можа быць кепска, можа ўвогуле скажа: "Хлястоў, сыйдзі са сцэны! Гэта папса!" Гэта людзі, і яны ў праве выбіраць тое, што хочуць!"

Вадзім Марголін, Яўген Чалышаў ("Харлі"), Раман Арлоў

гледачы

Тым не менш галоўным героем вечарынкі можна смела назваць Яўгена Чалышава, які па-школьнаму адказна падыйшоў да пастаўленай Арловым задачы, і знаходзіўся ля мікрафона большую частку канцэрта, у выніку чаго заспяваў этнічны вакаліз не горш за Алега Хаменку і прачытаў рэп не горш, за Памідорава, яшчэ аднаго героя. Аляксандр прыдаў канцэрту пуд гарачай мужчынскай энэргіі, забойнага рэпу і заставіў залу танчыць так, нібыта "У Нескладовае" – самы танцавальны беларускі праект.

А Арлоў… Арлоў – арол! І авантурыст. А авантурыстам, як вядома, шанцуе. Наперад, Раман!

Тэкст: Маша Лагодзіч
Фота: Tarantino
"Еўрарадыё"

НЕАФІЦЫЙНАЕ ВІДЭА ад ttoossyyaa

"У нескладовае 1" – Віктар Рудэнка і Яўген Чалышаў

"Сусвет" – Аляксей Хлястоў

"На тонкай мяжы" – Уладзімір Пугач

"Не кожны" – Віктар Рудэнка, Аляксандр Памідораў, Алег Хаменка

"Пад месяца святлом" – Вадзім Касалапаў