18 сьнежня ў клюбе TNT адбылася жывая прэзэнтацыя альбому "Трымай свой час". Адначасова гэта быў апошні выступ гурту разам з Яўгенам Бузоўскім, нязьменным гітарыстам IQ48. Менавіта ён разам з Паўлам Зыгмантовічам у 2000 годзе заснаваў гэтую каманду.
"Аддаў IQ48 16 год свайго жыцьця і, вядома ж, не шкадую. Да пэўнага моманту ўсё было крута і гарэў агеньчык, але пасьля пачалася стагнацыя – гурт не хацеў разьвівацца далей. Разважаў некалькі месяцаў і прыняў рашэньне сыйсьці", – сказаў у камэнтары для Tuzin.fm Яўген.
"Так, на апошняй рэпэтыцыі Яўген нам паведаміў, што сыходзіць. Гэта яго рашэньне і пярэчыць яму мы ня можам. Не магу пакуль нічога сказаць пра будучыню гурту. Пакуль IQ48 на паўзе – ня ведаю на міні-паўзе ці на максі-паўзе. Але я думаю, што мы зьбярэмся, калі будзе на тое важнае нагода", – пракамэнтаваў сытуацыю Tuzin.fm вакаліст гурту Аляксандар Ракавец. Ён удакладніў, што замену свайму гітарысту яны пакуль не шукалі.
Што да Яўгена Бузоўскага, то ён не сыходзіць з музыкі. Ён абяцае зьявіцца неўзабаве ў складзе іншага беларускага рок-гурту.
Тэкст: Tuzin.fm
Фота: Budzma.org