Лявон Вольскі зьбірае грошы на новы альбом (+відэа)

Лявон Вольскі вырашыў зьвярнуцца па дапамогу да сяброў і прыхільнікаў, каб запісаць новы альбом, які мае стаць працягам паспяховага дыску "Грамадазнаўства" (2014). Лявон кажа, што канцэпцыя яго новага альбому цалкам гатовая, некаторыя песьні нават запісаныя часткова ў студыі.

"Надыйшоў час гэтага працягу. Ёсьць усё – песьні, задумы, крэатыў, віленская студыя Снорэ Бэргеруда. Няма толькі фінансавага складніку працэсу, кажучы наўпрост – грошай. Вось так здараецца – раней неяк знаходзіліся, а цяпер – ну, ніяк", – заявіў музыка.

Збор сродкаў вырашана зрабіць на афіцыйным сайце сьпевака. Ахвяраваць можна суму ад 5 да 1500 эўра. Імёны ўдзельнікаў талакі абяцаецца пазначыць пры жаданьні на старонцы, на дысках, а таксама запрасіць зьняцца ў кліпе на адну зь песень з будучага альбому. Рэліз пакуль што безназоўнага дыску і яго канцэртная прэзэнтацыя заплянаваныя на 2016 год.

У размове з "Еўрарадыё" музыкант пацвердзіў, што матэрыял для новага альбома ўжо гатовы: "Новы альбом будзе крышачку іншы, чым папярэдні. Ён будзе напалову цяжкі, напалову лёгкі".

Дыск "Грамадазнаўства" летась перамог у намінацыі "Альбом года" на прэміі Rock Profi (па галасах музыкаў), а таксама быў у намінантах прэміі Experty.by (па галасах музычных журналістаў).

Таксама на сайце Вольскага выкладзеная першая частка музычнага фільму "Vilnia.Vola.Volski", які зьняла літоўская рэжысэрка Марыя Мэскавайтэ на прэзэнтацыі "Грамадазнаўства".

Падтрымаць праект можна на сайце www.lavonvolski.com

Тэкст: Experty.byпаводле Tuzin.fm, Euroradio.fm