РСП выдалі "модны танцавальны" альбом (+слухаць/+cпампаваць)

Гурт "Разбітае сэрца пацана" выдаў трэці студыйны альбом "Пасрэдствам срэдств", які змяшчае 14 трэкаў, у тым ліку вядомыя ўжо кампазіцыі "Што-та не так" і "Вам, наркаманам". Грошы на запіс дыска музыкі "адбівалі" з дапамогай краўдфандынгавай платформы Ulej.by.

"Пра боль і адчай, пра пошукі і барацьбу і вядома пра каханне. 13 зонгаў пранікнутых настроем легкага смутку і у той жа час надзеі, якая ўсім нам так цяпер патрэбная! Модны танцавальны індзі-сінці-поп ды актуальныя тэксты на трасянцы", – так апісваюць свой дыск самі музыкі "РСП".

Дыск запісваў Дзмітрый Каршакевіч на студыі Sunflowers. Саўнд-дызайн, звядзенне і майстэрынг рабіў Яўген Сухавей, уладальнік Rock Profi за лепшы запіс па выніках 2013 года, які таксама працаваў з Akute ды Yellow Brick Road. На пакрыццё студыйных выдаткаў музыкі сабралі больш за 22 мільёны рублёў. Канцэртная прэзентацыя дыска адбудзецца 21 лістапада ў клубе "Пляцоўка-хол" ("Палац рэспублікі").

Спампаваць альбом можна на сайце мультылэйбла "Пяршак".

Тэкст: Experty.by