Ціхан Золатаў выдаў сольны дэбют (+спампаваць)

Ціхан Золатаў, экс-басіст Svet Boogie Band, Divina Enema, лідар Gentle Beat, прэзентаваў у Інтэрнэце дэбютны сольны альбом “Все оттенки чёрного”. Дыск складаецца з 11 песень, напісаных за больш чым 10 гадоў абсалютна рознафарматнай музычнай дзейнасці.

– На альбоме сабраныя песні, якія былі напісаныя за апошнія больш чым 10 гадоў, яшчэ нават ў перыяд, калі існавала Divina Enema, – распавёў музыка. – Але я ніколі сур’ёзна не ставіўся да гэтых песень і не збіраўся выдаваць іх у выглядзе альбома. Да таго ж, былі розныя праекты, гурты… Але пасля праекта Svet Boogie Band адбыўся такі пераварот у маім жыцці, пасля якога я вырашыў, што апроч бас-гітары я навучуся спяваць і падыму свой матэрыял. Сустрэўся з гітарыстам Аляксандрам Калейнікам, з якім мы працавалі ў Divina Enema, ён неяк з радасцю падтрымаў маю ідэю і мы разам узяліся за аранжыраванне. У выніку, мне падаецца, атрымаўся вельмі цікавы прадукт.

Канцэртная прэзентацыя альбома адбудзецца 29 траўня ў кафэ LOFT. Уваход вольны. Пачатак у 19.30. Замова столікаў на тэлефоне (029) 380 00 10.

Паслухаць і спампаваць альбом можна на сайце "Еўрарадыё".

Тэкст: паводле "Еўрарадыё"