Выйшла складанка "Прэм'ер Тузін 8" (+слухаць/+cпампаваць)

Музычны партал Tuzin.fm выдаў складанку "Прэм'ер тузін" па выніках 2015 году. Нягледзячы на прысутнасць вядомых артыстаў (Akute, Tonqixod, Андрэй Макарэвіч), пераважная частка складанкі прысвечана менавіта новым праектам на беларускай мове. Сярод іх і шэраг намінантаў прэміі "Героі году", уручэнне якой адбудзецца 12 снежня ў клубе "Пляцоўка-хол".

У фармаванні складанкі ўдзельнічала экспертная рада, якую сёлета склалі беларускія паэты: Андрэй Хадановіч, Глеб Лабадзенка, Антон Рудак, Наста Кудасава, Андрэй Адамовіч. Менавіта яны назвалі з усіх удзельнікаў аўдыёчарту ў музычным сезоне на "Тузіне" вартых удзелу ў выніковым туры. Такіх песень набралася каля 40. Выніковую 12-ку найлепшых з іх па традыцыі абралі слухачы, у тым ліку і галоўную песню сезону - "Будзь злой" ад новага праекту Яна Маўзера "Мама".

– "Прэм'ер Тузін" не прэтэндуе на аб'ектыўнасць, але дае ўяўленне пра стан сучаснай беларускай музыкі ды паказвае яе шматстайнасць – тут прадстаўлены рэп, поп-рок, фольк-рок, пост-панк, альтэрнатыўная музыка, – адзначае галоўны рэдактар парталу Сяргей Будкін.

"Прэм'ер Тузін" выдаецца з 2005 года па выніках галасавання ў музычным чарце на "Тузіне Гітоў". Дыск двойчы быў прызнаны "Праектам году" на ўзнагародах "Рок-Каранацыя" у 2005 і 2006 годзе. Складанка "Прэм'ер Тузін-2011" заняла 1-ае месца па выніках году сярод самых прадавальных беларускіх дыскаў па версіі кампаніі "Вігма", аднак у далейшым партал вырашыў адмовіцца ад выдання на CD. Другі год складанка выходзіць у інтэрнэце.

12 снежня (субота). 19.00. Прэмія "Героі году" з удзелам Pauline, Zolki Band, Angst, Re1ikt, Navi. Квіткі (з улікам камісіі аператара) — 150 000 (танцпляц), 180 000 (столік). Квіткі можна набыць онлайн або ў касах kvitki.by па ўсёй краіне. Тэлефон для даведак: + 375 29 687-20-93

Спампаваць кампіляцыю на сайце Tuzin.fm.

Тэкст: Experty.by